काठमाडौं – नेकपा एमाले अध्यक्ष केपी शर्मा ओली र वरिष्ठ नेता माधव कुमार नेपालबीच टेलिफोन संवाद भएको छ ।
लामो संवादहीनता तोड्दै अध्यक्ष ओली र नेपालबीच टेलिफोन वार्ता भएको नेपालनिकट नेता सोमप्रसाद पाण्डेले जानकारी दिए । दुई नेताबीच आज भेट हुने सम्भावना रहेको पाण्डेले बताए । भेटको समय र स्थान भने तय भएको छैन् । आज बिहान पुनः टेलिफोन संवाद हुनेछ, त्यसपछि भेट हुने तयारी छ ।
नेपालनिकट नेता भीम आचार्यले दुई जनाबीच टेलिफोनमा सम्वाद हुनु एमाले पार्टीका लागि सुखद् पक्ष भएको भन्दै खुशी व्यक्त गरे । उनले पार्टी एकताका लागि दुवै नेता गम्भीर रहेको प्रतिक्रिया दिए । कुराकानीलाई निरन्तरता दिने पनि उनको भनाइ छ।
अनौपचारिक स्रोतका अनुसार नेपाल समूह लचिलो भए केन्द्रीय समिति बैठक स्थगित गर्ने तयारी छ ।
नेपाल पक्षले नेपाली कांग्रेसका सभापति शेरबहादुर देउवालाई प्रधानमन्त्री बनाउन हस्ताक्षर गरेका थिए। उक्त हस्ताक्षर गरेपछि ओली र नेपाल पक्षबीच सम्बन्ध चिसिएको थियो।
