काठमाडौं- नेपाली कांग्रेसका शीर्ष नेताहरुको बैठक सरेको छ। प्रधानमन्त्री एवं नेपाली कांग्रेसका सभापति शेरबहादुर देउवाले आज दिउँसो २ बजे बस्ने गरि पार्टीका पदाधिकारी र पूर्व पदाधिकारीको बैठक बोलाएका थिए। तर, प्रधानमन्त्री देउवाको व्यस्तताका कारण आजका लागि बोलाइएको बैठक सरेको कांग्रेस प्रवक्ता विश्वप्रकाश शर्माले जानकारी दिए।
आज स्थगित गरिएको बैठक भोलि(शुक्रबार) दिउँसो २ बजे बस्ने कांग्रेस मुख्यसचिव कृष्णप्रसाद पौडेलले अन्नपूर्ण टाइम्सलाई जानकारी दिए। तर स्थानबारे भने टुंगो नलागेको उनको भनाइ छ।
बैठकमा नयाँ सरकारका प्राथमकिता, मन्त्रिपरिषद् विस्तार र आसन्न महाधिवेशनका सन्दर्भमा छलफल हुने बताइएको छ। कांग्रेसको तल्लो तहको अधिवेशनको मिति फेरि सार्ने तयारी गरिएको छ। केन्द्रीय महाधिवेशन प्रभावित नहुने गरी तल्लो तहको अधिवेशनको मिति केही समय सार्न लागिएको हो। शीर्ष नेताहरुको बैठकले सम्भवत: नयाँ कार्यतालिकाबारे निर्णय गर्नेछ।
वडा, गाउँ/नगर, जिल्ला र प्रदेश निर्वाचनको मिति केही दिन पर धकेलिने क्रियाशील सदस्यता छानबिन समितिका प्रवक्ता प्रदीप पौडेलले जानकारी दिए। साउन १२ बाट वडा तहको अधिवेशन गरी तल्लो तहका अधिवेशन सुरु गर्ने कार्यतालिका यसअघि सार्वजनिक गरिएको थियो। तल्लो तहको अधिवेशनको मिति केही दिन पर सार्ने भनिएपनि कति दिन भन्नेबारे खुलाइएको छैन।
