श्रम रोजगार तथा सामाजिक सुरक्षामन्त्री शरतसिंह भण्डारीले वैदेशिक रोजगारीमा जानेलाई धितो बिना ऋण दिने प्रक्रिया अगाडि बढाइएको बताउनु भएको छ।
मन्त्री भण्डारीले साहु महाजनबाट कर्जा लिएर वैदेशिक रोजगारीमा जानु पर्ने अवस्थाको अन्त्य हुने बताउँदै गन्तव्य देशको लागत खर्च तोकेर बैंकबाट बिनाधितो ऋणको प्रक्रिया अगाडि बढाइएको बताउनुभयो। विदेशबाटै २ वर्षमा २४ किस्ता बुझाएर ऋण चुक्ता गर्ने व्यवस्था मिलाईको पनि उहाँले जानकारी दिनुभयो ।
उहाँले बैंकबाट सहज रुपमा ऋण पाउँदा लागत खर्च घट्ने र ठगीको घटनासमेत न्यूनीकरण हुने विश्वास व्यक्त गर्नुभयो। महोत्तरीको बर्दिबासमा शुक्रबार वैदेशिक रोजगार विभागले रोजगार अनुमति प्रणाली (ईपीएस)मार्फत दक्षिण कोरिया जान चाहनेहरुको लागि कोरियन भाषा परीक्षा मर्यादित, पारदर्शी र निष्पक्ष सञ्चालन हुने विषयक अन्तरक्रिया कार्यक्रममा मन्त्री भण्डारीले रोजगारीको विकल्प वैदेशिक रोजगारी रहेको र वैदेशिक रोजगारी व्यवस्थित, सुरक्षित, आकर्षक र मर्यादित बनाउन मन्त्रालय सक्रिय रहेको बताउनुभयो । मन्त्री भण्डारीले सुरक्षित र जानकारी लिएर अन्य देशभन्दा कोरिया जान मधेश प्रदेशका स्थानीय तहले नागरिकलाई सचेत बनाउनु पर्ने समेत बताउनुभयो।
वैदेशिक रोजगारीको क्रममा ठगी भएको बताउँदै ६ हजार २ सयभन्दा बढी उजुरी काठमाडौंमा मात्रै रहेकोले कानुन बनाएर दोषीलाई कारबाही गर्ने तयारी मन्त्रालयले गरेको भण्डारीले जानकारी दिनुभयो । कार्यक्रममा मधेश प्रदेशका श्रम तथा यातायातमन्त्री कौशलकिशोर रायले कोरिया भाषा सिक्न मधेश प्रदेशका ८ वटै जिल्लामा प्रशिक्षण केन्द्र स्थापना गर्नुपर्ने बताउनुभयो। शिक्षा तथा संस्कृतिमन्त्री रानीकुमारी तिवारीले सीप र भाषा सिकेरमात्रै वैदेशिक रोजगारीमा जानु पर्ने चेतना स्थानीय तहमा हुने रोजगार शाखाले दिनु पर्नेमा जोड दिनुभयो ।
नेकपा एमालेकी प्रदेश सांसद शारदा थापाले विदेश जान चाहनेलाई रोक्न नसके पनि रोजगारीको अवसर ल्याएर वैदेशिक रोजगारीमा जाने समूहलाई मुलुकमै रोक्ने समय आएको बताउनुभयो।कार्यक्रममा महोत्तरीका स्थानीय तहका प्रमुख, उपप्रमुख, स्थानीय तहका रोजगार संयोजकहरु, शिक्षक र महिला स्वास्थ्य स्वयंसेविकाहरुले सहभागीता जनाएका थिए ।
