नेप्लिज रेडियोथेरापी तथा अङ्कोलोजी समाज अब एसियाली संगठनहरूको महासंघ फेडरेसन अफ एसियन अर्गनाइजेसन्स फर रेडिएसन अङ्कोलोजी (फारो) को पूर्ण सदस्य बनेको छ। यो सदस्यता मलेसियाको क्वालालम्पुरमा २३-२५ अगस्टमा आयोजित फारो परिषद्को बैठकमा प्रदान गरिएको हो।
फारो एसियाभरका रेडिएन र क्लिनिकल अङ्कोलोजी संगठनहरूको एक साझा संघ हो, जसले क्षेत्रीय सहकार्य, अनुसन्धान र क्यान्सर उपचारको स्ट्यान्डर्ड बनाउन महत्वपूर्ण भूमिका खेल्दछ।
समाजको फारो सदस्यताले नेपाललाई अन्तर्राष्ट्रिय स्तरमा ज्ञान र अनुभव आदान प्रदान गर्ने, नवीनतम प्रविधि र उपचार पद्धतिहरूमा पहुँच प्राप्त गर्ने, क्षेत्रीय र अन्तर्राष्ट्रिय अनुसन्धान परियोजनाहरूमा सहभागी हुने र नेपाली चिकित्सकहरू तथा वैज्ञानिकहरूका लागि प्रशिक्षण र क्षमता अभिवृद्धिका अवसरहरू सिर्जना गर्नेछ।
क्वालालम्पुरमा आयोजित युरोपियन सोसाइटी अफ रेडियोथेरापी एण्ड अनकोलोजी (ESTRO) र फारो सोसाइटीको संयुक्त बैठकमा उपाध्यक्ष डा विवेक आचार्य, सचिव डा सन्ध्या चापागाईं, सदस्य डा सीमित सापकोटा लगायतको उपस्थिति थियो।
कार्यक्रममा कोषाध्यक्ष डा सुभाष पण्डितले नेपालको तर्फबाट नेपालमा क्यान्सर रोग र उपचारको वर्तमान अवस्था, हालसम्मको प्रगति र भविष्यका समाजले गर्ने लागेका योजनाहरूलाई प्रकाश पार्नुभएको थियो।
आगामी दिनहरूमा फारोसँगको सहकार्यमा अन्तर्राष्ट्रिय सम्मेलनहरू, प्रशिक्षण कार्यशालाहरू र संयुक्त अनुसन्धान परियोजनाहरू लगायतका विभिन्न कार्यक्रमहरूको आयोजना गर्ने समाजको योजना रहेको छ ।
