काठमाडौँ, भदौ २४ गते । उपराष्ट्रपति रामसहाय प्रसाद यादवले पेरिस पारा ओलम्पिकमा ऐतिहासिक कांस्य पदक दिलाउन सफल पलेशा गोवर्धनलाई सम्मान गर्नुभएको छ । लैनचौरस्थित उपराष्ट्रपतिको कार्यालयमा सोमबार विशेष समारोहमा पलेशालाई सम्मान गरिएको हो ।
उपराष्ट्रपति यादवले पलेशाले देशको नाम उच्च राख्नु भएकोमा सम्पूर्ण नेपाली खुसी भएको बताउँदै पलेशाले नेपालका लागि इतिहास रच्दै विश्वभरि छरिएर रहेका नेपालीहरूलाई गौरवान्वित हुने सुनौलो अवसर प्रदान गर्नुभएको बताउनुभयो ।
उपराष्ट्रपति यादवले पलेशाको यो ऐतिहासिक सफलता उहाँको अथक परिश्रम, दृढ सङ्कल्प, उत्कृष्ट प्रदर्शन तथा समर्पणबाटै प्राप्त भएको बताउँदै
पलेशालाई धन्यवाद ज्ञापन गर्नुभयो । उहाँले पलेशाको अद्वितीय उपलब्धि र सफलतामा महत्त्वपूर्ण योगदान दिने सम्पूर्ण सहयोगी हातहरू, मन्त्रालय, प्रशिक्षक, खेल पदाधिकारीसहित सम्पूर्ण व्यक्तित्वलाई समेत धन्यवाद व्यक्त गर्नुभयो ।
पलेशाको अतुलनीय योगदानले सिङ्गो नेपाल र नेपाली समाजलाई असीम गर्वको सुखानुभूति गराएको बताउँदै उहाँले उक्तसफलता नेपालका सबै खेलाडीका लागि प्रेरणादायी रहेको जिकिर गर्नुभयो । कार्यक्रममा युवा तथा खेलकुद मन्त्री तेजुलाल चौधरी, मन्त्रालयका सचिव, पलेशाका प्रशिक्षक, उपराष्ट्रपति कार्यालय तथा निजी सचिवालयका कर्मचारीहरु लगायतको उपस्थिति रहेको थियो ।
पलेशाले पेरिस पारा ओलम्पिकमा तेक्वान्दोको ४४ विधाअन्तर्गत महिला ५७ केजीमुनिको प्रतिस्पर्धामा सर्बियाकी खेलाडी मारिजा मिचेभलाई १५–८ ले पराजित गर्दै कांस्य पदक जित्नुभएको हो ।
स्रोत : उपराष्ट्रपति सचिवालय
