काठमाडौँ, भदौ २४ गते। राष्ट्रपति रामचन्द्र पौडेलले ऐतिहासिक राजनीतिक उपलब्धि हासिल गरेतापनि आदर्श राजनीतिमा आएको ह्रासका कारण अझैपनि जनताका अपेक्षा अनुसार काम गर्न नसकेको बताउनुभएको छ। बिपी ट्रस्टद्वारा सोमबार राष्ट्रपति भवन शीतल निवासमा आयोजित कार्यक्रमलाई सम्बोधन गर्दै राष्ट्रपति पौडेलले ऐतिहासिक र गर्व गर्न लायक राजनीतिक उपलब्धि हासिल गरेतापनि अझैसम्म पनि आफूहरुले जनताको अपेक्षा बमोजिम काम गर्न नसक्नुमा आदर्श राजनीतिमा आएको ह्रास जिम्मेवार रहेको बताउनुभयो। सत्ता जनताको सेवा गर्ने राजनीतिक साधन हो तर साध्य होइन। तर कतै आफूहरुले सत्तालाई साध्य मानेर आदर्श राजनीतिलाई टाढा राख्दा यस्तो भएको हो कि भन्नेमा चिन्ता लागिरहेको बताउनुभयो ।
उहाँले सिद्धान्तमा सम्झौता गरेको भए बिपी सायद जीवनकालभर सत्तामा रहिरहन सक्ने बताउँदै बिपीले सत्ता होइन देश र जनताको हितका निम्ति सिद्धान्तप्रतिको निष्ठालाई कहिल्यै डगमगिन नदिएको स्मरण गर्नुभयो। उहाँले सिद्धान्तप्रतिको सम्पूर्ण निष्ठा, नैतिक मूल्य, मान्यतासहितको आदर्श राजनीति तथा देश र जनताप्रतिको समर्पण बिपीका विशेषता भएको जुन सधैँ प्रेरणाका रूपमा रहिरहने विश्वास व्यक्त गर्नुभयो । उहाँले सङ्घीय लोकतान्त्रिक गणतन्त्रलाई बलियो बनाउँदै मुलुकलाई आर्थिकरूपमा समृद्ध बनाउन बिपीले अघि सार्नुभएको कल्याणकारी राज्यको अवधारणा सिद्धान्त, मूल्य मान्यता र उच्च नैतिक आदर्श राजनीति आज पनि उत्तिकै सान्दर्भिक रहेको स्पष्ट पार्नुभयो।
कार्यक्रममा बिपी ट्रस्टद्वारा हरेक वर्ष झैं यो वर्ष साहित्य साधनामा आफ्नो जीवन अर्पण गर्नुभएका साहित्यकार द्वारिका श्रेष्ठलाई एक लाख एक हजार नगद राशि सहितको र बिपीको आदर्श, मूल्य, मान्यताप्रति समर्पित प्रजातन्त्रका सेनानी भोजराज भण्डारीलाई ५१ हजार नगद राशि सहितको पुरस्कार प्रदान गरिएको छ।
स्रोत राष्ट्रपति कार्यालय
