काठमाडौँ, भदौ २६ गते । प्रधानमन्त्री केपी शर्मा ओलीले पलेसा गोवर्द्धनले पारा ओलम्पिकमा कांस्य पदक जित्नु एक कोशेढुङ्गा साबित भएको बताउनुभएको छ । राष्ट्रिय खेलकुद परिषद्को ६१औँ वार्षिकोत्सवका अवसरमा बुधबार काठमाडौंमा आयोजित कार्यक्रममा प्रधानमन्त्री ओलीले नेपाल खेल क्षेत्रबाट क्रमशः अन्तर्राष्ट्रिय जगतमा चिनिन थालेको र पछिल्ला समयमा खेल क्षेत्रले अन्तर्राष्ट्रियस्तरमा उपलब्धि हासिल गर्न थालेकोमा खुशी व्यक्त गर्नुभयो ।
प्रधानमन्त्री ओलीले पुरस्कार घोषणा भएर प्राप्त नहुने रोग अब अन्त्य हुने स्पष्ट पार्दै पलेसालाई दिइने ६५ लाख रुपियाँ पुरस्कार कर नकटाई छिट्टै दिइने बताउनुभयो । नेपालीले मौका पाएपछि गर्छ भनेर आफूले बताउँदै आएको दाबी गर्दै उहाँले नयाँ नयाँ सफलता र कीर्तिमान कायम गर्दै पुराना कीर्तिमानहरू तोड्दै जानुपर्नेमा जोड दिनुभयो ।
परिषद्का संरक्षकसमेत रहनुभएका प्रधानमन्त्री ओलीले अबको लक्ष्य जापानको ओलम्पिक खेल हुनुपर्ने बताउँदै एसियन खेल लक्ष्य हुनुपर्नेमा जोड दिंदै त्यसको तयारी र अभ्यासमा लाग्न अनुरोध समेत गर्नुभयो ।
कार्यक्रममा प्रधानमन्त्री ओलीबाट पारा ओलम्पिकमा ऐतिहासिक कांस्य विजेता पलेसा गोवर्धन र १९औँ एसियाली खेलकुद एसियाडमा रजत विजेता एरिया गुरुङ लगायतका विभिन्न खेलमा यसवर्ष उत्कृष्टता हासिल गर्ने खेलाडीहरूलाई सम्मान वितरण गरिएको थियो । कार्यक्रममा युवा तथा खेलकुद मन्त्री तेजुलाल चौधरी, मन्त्रालयका विशिष्ट व्यक्तित्व, राखेपका पदाधिकारी, खेल सङ्घका प्रतिनिधि, खेलाडी, प्रशिक्षक लगायतको उपस्थिति रहेको थियो ।
स्रोत : प्रधानमन्त्रीको सचिवालय
