काठमाडौं, भदौ २७ गते । नेपालका लागि म्यानमार, अष्ट्रेलिया, फ्रान्सका आवासीय र जाम्बियाका गैरआवासीय राजदूतले आ–आफ्नो ओहोदाको प्रमाणपत्र राष्ट्रपति रामचन्द्र पौडेलसमक्ष पेस गर्नुभएको छ । राष्ट्रपति भवनमा बिहीबार आयोजित छुट्टाछुट्टै विशेष समारोहमा नवनियुक्त राजदूतहरूले आ–आफ्नो ओहोदाको प्रमाणपत्र पेस गर्नुभएको हो ।
राष्ट्रपतिसमक्ष क्रमशः म्यो मिन्ट माउङ, लीन एलिजाबेथ जोनस्टन, भर्जिनी कोर्टेवल र पर्सी प्यासन चन्दले ओहोदाको प्रमाणपत्र पेस गर्नुभएको हो । समारोहमा परराष्ट्र मन्त्री डा आरजु राणा देउवा लगायत नेपाल सरकारका उच्च पदस्थ अधिकारीहरू समेतको उपस्थिति रहेको थियो। नवनियुक्त राजदूतहरूलाई काठमाडौँस्थित होटल डुसिट प्रिन्सेस देखि राष्ट्रपति भवनसम्म रिसल्ला सहितको बग्गीमा सवार गराइएको जानकारी राष्ट्रपति कार्यालयले जनाएको छ।
स्रोत : राष्ट्रपति कार्यालय
