काठमाडौं, भदौ २९ गते। आगामी ओस्कारका लागि नेपालबाट मीन भामको चलचित्र ‘साम्बाला’ले प्रतिनिधित्व गर्ने भएको छ । अमेरिकामा अर्को वर्ष हुने ओस्कार अवार्डको ९७ औं संस्करणका लागि नेपालबाट साम्बालाले प्रतिनिधित्व गर्ने भएको हो ।
साम्बाला शुक्रबार देखि सार्वजनिक प्रदर्शनमा आएको छ । जर्मनीमा सम्पन्न ७४ औं बर्लिन अन्तर्राष्ट्रिय चलचित्र महोत्सवमा छनोटमा परेर अत्यधिक प्रशंसा कमाएको साम्बालामा नेपालको उच्च हिमाली क्षेत्रको जनजीवनलाई प्रस्तुत गरिएको छ । बहुपति प्रथाको पृष्ठभूमिमा व्यापारका लागि ल्हासा पुगेर हराएका पति खोज्न निस्किएकी एक गर्भवती महिलाको कष्टकर यात्राको कथालाई चलचित्रमा देखाइएको छ ।
साढे दुई घण्टा अवधिको चलचित्रको कथा मीन भाम र अविनाशविक्रम शाहले लेख्नुभएको हो । सुनी फिल्म्सको ब्यानरमा निर्मित चलचित्रमा थिन्ले ल्हामो, सोनम तोप्देन, तेन्जिङ डल्हा, कर्मा, लोटन निमलिङ्ग, जंगबहादुर लामा, बालकलाकार कर्मा वाङ्ग्याललगायतको जीवन्त अभिनय देख्न सकिन्छ ।
गत आइतबार प्रिमियर शोमा चलचित्र हेरेका भारतीय कलाकार नवाजुद्दिन सिद्दिकी र अनुराग कश्यप दुवैले चलचित्र उत्कृष्ट बनेको र आफूलाई असाध्यै मनपरेको बताएपछि साम्बालाको चर्चा झन् चुलिएको छ । चलचित्र प्रदर्शनमा आउनुअघि नै समीक्षकहरुले चलचित्रका बारेमा सकारात्मक प्रतिक्रिया समेत दिएका थिए।
ुसाम्बालाुमा पेमाको भूमिका निर्वाह गरेकी अभिनेत्री थिन्ले ल्हामोले यसै फिल्मको अभिनयका लागि स्विट्जरल्याण्डको प्रसिद्ध लोकार्नो फिल्म फेस्टिभलमा ‘बोक्कालिनो डिओर’ अवार्ड समेत जित्न सफल हुनुभएको छ । युरोपभरका चलचित्र समीक्षकले उत्कृष्ट अभिनय गर्ने कुनै एक कलाकारलाई उक्त अवार्ड प्रदान गर्ने गर्छन् । दक्षिण एसियाली कलाकारले यो अवार्ड जितेको पहिलोपटक नै हो ।यसअघि पनि मिन भामले निर्देशन गर्नुभएकोको चलचित्र कालो पोथी विश्वप्रसिद्ध अस्कर अवार्डका लागि छनोट भएको थियो ।
