काठमाडौँ, भदौ २८ गते। नेपाली राष्ट्रिय क्रिकेट टोलीका कप्तान रोहित कुमार पौडेल र करातेकी एरिका गुरुङ वर्षको उत्कृष्ट खेलाडी घोषित हुनुभएको छ।
नेपाल खेलकुद पत्रकार मञ्चले शुक्रबार आयोजना गरेको पल्सर स्पोर्टस अवार्डमा रोहित पुरुषतर्फ र एरिका महिलातर्फ उत्कृष्ट खेलाडी घोषित हुनुभएको हो। दीपेन्द्रसिंह ऐरी, फुटबलका अनन्त तामाङ, गल्फका सुवास तामाङ र करातेका मोहमद शेख आलमलाई पछि पार्दै रोहितले उक्त अवार्ड हात पार्नुभएको हो।
रोहितको कप्तानीमा नेपालले वर्ष २०८० मा एसिसी प्रिमियर कपको च्याम्पियन बन्दै एसिया कपमा स्थान बनाएको थियो। साथै आइसिसी २०–२० विश्वकप एसिया छनोटको फाइनल पुग्दै नेपाल १ दशकपछि विश्वकपमा छनोट हुँदा समेत नेपाली टिम रोहितकै कप्तानीमा थियो।
रोहितले वि.स.२०८० मा २५ २० –२० अन्तर्राष्ट्रिय खेल खेल्दा ३ अर्धशतक सहित ६८० रन बनाई पाँच विकेट समेत लिनुभएको थियो। यस्तै उहाँले यस वर्ष २३ एकदिवसीय अन्तर्राष्ट्रिय खेलमा ३ अर्धशतसहित ५२५ रन पनि बनाउनुभएको थियो भने १० विकेट समेत लिनुभएको थियो। उत्कृष्ट पुरुष खेलाडीको अवार्डको साथ उहाँले एक थान पल्सर मोटरसाइकल पुरस्कार पाउनुभएको छ।
त्यसैगरी चीनको हाङचाउमा सम्पन्न १९औं एसियाली खेलकुदमा देशका लागि ऐतिहासिक रजत पदक दिलाउन सफल हुनुभएकी एरिका गुरुङ महिला वर्ष खेलाडी घोषित हुनुभएको छ। कबड्डीकी मेनुका राजवंशी, क्रिकेटकी रुबिना क्षेत्री, फुटबलकी सावित्रा भण्डारी र एथलेटिक्सकी सन्तोषी श्रेष्ठ उक्त अवार्डका लागि मनोनयनमा पर्नुभएको थियो।
यसैगरी नेपाली राष्ट्रिय भलिबल टोलीकी कविता भट्टले पिपल्स च्वाइस अवार्ड जित्न सफल हुनुभएको छ। नेपाल काभा महिला नेसन्स लिग २०२४ मा नेपाल दोस्रो हुँदा र काभा महिला भलिबल च्यालेन्ज कप २०२३ मा तेस्रो हुँदा उहाँ नेपाली टोलीको सदस्य हुनुहुन्थ्यो । सोही उपाधिका लागि गुलशन झा (क्रिकेट), मानमति विष्ट (कबड्डी) प्रीति राई (फुटबल) र श्रीराम श्रेष्ठ (रग्बी) का खेलाडीहरुको नाम मनोनयनमा परेका थिए।
साथै नेपालमा क्रिकेटमा महत्त्वपूर्ण योगदान पुर्याएका विनयराज पाण्डे ‘लाइफ टाइम अचिभमेन्ट अवार्ड’ बाट सम्मानित हुनुभयो। नेपाल क्रिकेट सङ्घ (क्यान) का पूर्वअध्यक्ष (२००५ देखि २०११) समेत रहनुभएका पाण्डे जयकुमारनाथ शाहको नेतृत्वमा क्रिकेट सङ्घ स्थापना हुँदा महासचिव हुनुहुन्थ्यो।
त्यस्तै भारोक्तन खेलका हेमन्त पाल प्लेयर अफ दि इयर घोषित हुनुभएको छ। उहाँले भारतमा भएको एसियाली जुनियर भारोत्तोलनमा तीन कांस्य पदक जित्नुभएको थियो । सोही अवार्डका लागि क्रिकेटर अर्जुन कुमाल, टेबल टेनिसका सुजन बडाल, फुटबलकी प्रिति राई, र टेनिसकी सुनिता थापा मनोनयनमा पर्नुभएको थियो।
यस्तै पारा तेक्वान्दो खेलाडी पलेशा गोवर्धनले पारा एथलिट अवार्डको उपाधि जित्नुभयो। यसै महिना फ्रान्सको पेरिसमा सम्पन्न पेरिस पारालिम्पिक्समा नेपाललाई ऐतिहासिक कास्य पदक दिलाउनुभएकी पलेशाले पारा एथलिट अवार्ड जित्नुभएको थियो। तर यो अवार्ड भने उहाँले १९ औं एसियाली खेलकुदमा ऐतिहासिक कास्य जितेको कारण प्राप्त गर्नुभएको हो।
त्यसैगरी पल्सर स्पोर्ट्स अवार्ड २०८० अन्तर्गत स्पेशल अवार्ड भने भलिबलका कुमार राईले हासिल गर्न सफल हुनुभयो । उहाँले नेपाली भलिबल खेलमा राष्ट्रिय टिमलाई र विभागीय टिमको लागि थुप्रै स्टार खेलाडी जन्माउन अतुलनीय योगदान पुर्याउनुभएको थियो।
पल्सर स्पोर्ट्स अवार्ड २०८० अन्तर्गत टिम अफ दी इयरको अवार्ड भने नेपाली राष्ट्रिय महिला कबड्डी टिमले जितेको छ। चीनको हाङचाउमा भएको १९औँ एसियाली खेलकुदमा राष्ट्रिय महिला कबड्डी टिमले ऐतिहासिक कास्य पदक जितेको थियो। नेपालले टिमतर्फ जितेको यो नै पहिलो पदक थियो।
यसैगरी १९औँ एसियाली खेलकुदमा नेपाललाई रजत पदक जिताउननु हुने करातेका प्रशिक्षक कुशल श्रेष्ठ वर्ष उत्कृष्ट प्रशिक्षक घोषित हुनुभयो। यस अवार्डको लागि श्रेष्ठसँगै राष्ट्रिय क्रिकेट टिमका प्रशिक्षक मोन्टी देसाई, कबड्डीकी पार्वती राई, पारा ओलम्पिकका कविराज नेगी लामा, भारात्तोलनका प्रशिक्षक सञ्जय महर्जन मनोनयनमा पर्नुभएको थियो ।
वर्ष पुरुष, वर्ष महिला, वर्ष प्रशिक्षक, वर्ष युवा र पिपल्स च्वाइस अवार्ड विजेतालाई जनही एक एक थान बजाज पल्सर मोटरसाइकल प्रदान गरिएको थियो भने बाँकीका विजेताले जनही रु एक लाख रुपैयाँ प्राप्त गरेका थिए। विजेतालाई युवा तथा खेलकुद मन्त्री तेजुलाल चौधरी, राष्ट्रिय खेलकुद परिषद्का सदस्य सचिव आयोजकका अध्यक्ष दुर्गानाथ सुवेदीलगायतले पुरस्कार प्रदान गर्नुभएको थियो।
स्रोत : पल्सर स्पोर्टस अवार्डको फेसबुक
