काठमाडौँ, असोज ७ गते । राष्ट्रपति रामचन्द्र पौडेलले हाम्रा भाषा, साहित्य, संस्कृति देशको गौरव र पहिचान भएको धारणा व्यक्त गर्नुभएको छ ।
राष्ट्रपति पौडेलले नेपाल प्रज्ञा प्रतिष्ठानको ६७ औँ वार्षिकोत्सवका अवसरमा प्रतिष्ठानद्वारा आयोजित राष्ट्रिय कविता महोत्सव, २०८१ को पुरस्कार समर्पण समारोहलाई सोमबार राष्ट्रपति भवन, शीतल निवासमा सम्बोधन गर्नुहुँदै सो धारणा व्यक्त गर्नुभएको हो ।
हाम्रा भाषा, साहित्य, संस्कृति तथा हामीसँग रहेका मौलिक एवम् रैथाने ज्ञान परम्पराको संरक्षण, संवर्द्धन र विकास गर्नु हाम्रो परम कर्तव्य भएको बताउँदै राष्ट्रपति पौडेलले भाषा, साहित्य, संस्कृति, दर्शन मानव जीवनका लागि अपरिहार्य विषय भएको बताउनुभयो । राष्ट्रपति पौडेलले भाषा मानिसका चाहना, भावना, विचारहरूको विनिमय गर्ने सशक्त माध्यम भएको तथा साहित्य भाषाको सबैभन्दा सुन्दर एवम् कलात्मक अभिव्यक्ति भएको बताउँदै साहित्यले भाषालाई श्रुतिमधुर बनाउने काम त गर्छ नै साथसाथै भाषालाई युगौँ युगसम्म जीवित राख्ने धारणा व्यक्त गर्नुभयो ।
उक्त अवसरमा राष्ट्रपति पौडेलले विजयी कविहरूलाई पुरस्कार प्रदान गर्नुभएको थियो ।
स्रोत : राष्ट्रपतिको सचिवालय
