तनहुँ, फागुन २३ गते । तनहुँ क्षेत्र नम्बर १ मा सम्पन्न प्रतिनिधि सभा सदस्य निर्वाचनमा राष्ट्रिय स्वतन्त्र पार्टी (रास्वपा) का उम्मेदवार डा. स्वर्णिम वाग्ले फराकिलो मतान्तरसहित विजयी हुनुभएको छ ।
मुख्य निर्वाचन अधिकृतको कार्यालयले सार्वजनिक गरेको अन्तिम मत परिणामअनुसार कुल ६४ हजार ८८० सदर मतमध्ये डा. वाग्लेले ३८ हजार ४० मत प्राप्त गर्नुभएको छ । उहाँका निकटतम प्रतिस्पर्धी नेपाली कांग्रेसका उम्मेदवार गोविन्द भट्टराईले १६ हजार २३१ मत प्राप्त गर्नुभएको छ । यससँगै डा. वाग्ले २१ हजार ८०९ मतान्तरले विजयी हुनुभएको हो ।
यसैगरी नेकपा (एमाले) की उम्मेदवार भगवती न्यौपानेले उल्लेख्य मत प्राप्त गरे पनि तेस्रो स्थानमा रहनुभएको छ ।
जिल्ला निर्वाचन कार्यालय तनहुँका प्रमुख विकास लम्सालका अनुसार यस क्षेत्रमा कुल १ लाख २६ हजार ८८२ मतदाता रहेकामा ५३ दशमलव ६९ प्रतिशत मतदान भएको थियो ।
अन्तर्राष्ट्रिय शैक्षिक तथा आर्थिक क्षेत्रका विज्ञका रूपमा परिचित डा. वाग्ले २०७९ चैतमा नेपाली कांग्रेस त्यागेर राष्ट्रिय स्वतन्त्र पार्टीमा प्रवेश गर्नुभएको थियो । २०८० वैशाखमा भएको उपनिर्वाचनमा पनि विजयी हुनुभएका उहाँले यसपटकको निर्वाचनमा अझ फराकिलो मतान्तरसहित आफ्नो जनमत थप मजबुत बनाएको विश्लेषण गरिएको छ ।
लन्डन स्कुल अफ इकोनोमिक्स, हार्भर्ड विश्वविद्यालय र अस्ट्रेलियन नेसनल युनिभर्सिटीबाट उच्च शिक्षा हासिल गर्नुभएका डा. वाग्लेले राष्ट्रिय योजना आयोगको उपाध्यक्ष तथा संयुक्त राष्ट्रसंघीय विकास कार्यक्रम (यूएनडिपी) को एसिया–प्रशान्त क्षेत्रीय आर्थिक सल्लाहकारका रूपमा समेत काम गरिसक्नुभएको छ ।
उहाँलाई भविष्यमा देशको सम्भावित अर्थमन्त्रीका रूपमा समेत हेरिएको छ।
