काठमाडौं । केहि वर्षअघिदेखि गीत गाउँदै आएकी गायिका एवं नेकपा अध्यक्ष पुष्पकमल दाहाल ‘प्रचण्ड’की नातिनी स्मीता दाहाल पछिल्लो समय एकपछि अर्को भिडियोमा आफै अभिनयमा उत्रिएकी छिन् ।
आफैले गाएका केहि भिडियोमा सपोर्टिङ रोल निर्वाह गर्दै आएकी गायिका स्मीता पछिल्ला केहि भिडियोमा आफै लिडरोलमा देखिएकी छिन् । यसअघि नायक सलोन बस्नेतसंगको अभिनयपछि स्मीता महानायक राजेश हमालसंग देखिएकी छिन् । स्मीता र राजनराज शिवाकोटीको स्वर रहेको ‘मालिङ्गो’ बोलको गीतको भिडियो यूट्यूबमा रिलिज भएको ५ घण्टा बित्न नपाउँदै १ लाख बढि भ्यूज पाएको उक्त भिडियो रिलिजको ६ घण्टामै ट्रेण्डिङमा पर्न समेत सफल भयो । यो समाचार तयार पार्दासम्म भिडियो यूट्यूब ट्रेण्डिङको टप टेनमा प्रवेश गरिसकेको छ ।
सुनिता नेपाल सुवेदीको शब्द रहेको उक्त गीतमा राजनराज शिवाकोटीको संगीत, उदयराज पौडेलको एरेन्ज, श्यामस्वेत रसाइलीको मिक्सिङ तथा भुपेन्द्र अधिकारीको सम्पादन तथा रेनिस फागोको कलर करेक्सन रहेको छ । सरोज ओलीको निर्देशनमा बनेको भिडियोमा सुनिल क्षेत्रीको कथा र कोरियोग्राफी रहेको छ भने भिडियोलाई नवराज उप्रेतीले खिचेका हुन् ।
करिब एक दुई महिनाकै हाराहारीमा महंगा महंगा भिडियो सार्वजनिक गर्दै आएकी गायिका स्मीताले यसपछि कसलाई आफ्नो जोडी बनाउने हुन् त्यो भने हेर्न बाँकी छ ।
