काठमाडौं, असोज ३० गते। नेपालीहरूको महान् पर्व बडादशैंको अवसर पारेर ‘ऐला लूवया’, ‘माया मदुला’, ‘मखं त्वाः या ग्वाः’ लगायतका नेपाल भाषाका गीतबाट चर्चित युगल जोडी निशा देशार र रोज मान महर्जनको नयाँ गीत ‘नूगले तेलात’ सार्वजनिक भएको छ।
ज्यास फिल्म्सको प्रस्तुति रहेको यस गीतमा प्रेम, भावना र मनोरञ्जनात्मक प्रस्तुतिलाई समेटिएको छ। गीतको शब्द तथा संगीत सिर्जना रोज मान महर्जनकै रहेको छ। रोज मान महर्जन र निशा देशारको सुमधुर स्वर रहेको गीतको अडियो रेकर्डिङ ज्योति रेकर्ड्समा गरिएको हो। गीतको अडियो रेकर्डिङ, एरेन्जमेन्ट, मिक्सिङ तथा मास्टरिङ फिरोज बज्राचार्यले गरेका छन्।
आशुतोष बराहीको निर्देशनमा तयार भएको गीतको भिडियोमा नायिका निती शाह, मनोज महर्जन, सञ्जना महर्जन र जेनिश शाक्यको आकर्षक अभिनय देख्न सकिन्छ। भिडियोमा कलाकारहरूको प्रस्तुति तथा निर्देशकको दृश्यात्मक शैलीलाई विशेष प्राथमिकता दिइएको छ।
गीत तथा भिडियो दुवै पक्षलाई आकर्षक बनाउने प्रयास गरिएको निर्माण पक्षले जनाएको छ। भिडियोमा कलाकारहरूको अभिनयसँगै आकर्षक नृत्य प्रस्तुतिलाई समेत समेटिएको छ।
‘नूगले तेलात’ गीतमा निती शाहसहितका कलाकारहरूको आकर्षक नृत्यसहितको अभिनयले दर्शकको ध्यान तान्ने अपेक्षा गरिएको छ। बडादशैंको अवसरमा सार्वजनिक गरिएको यो गीतले नेपाल भाषा तथा नेपाली संगीतप्रेमी दर्शकको मन जित्ने विश्वास निर्माण पक्षले लिएको छ।
