इच्छा गुरुङ
‘आशावादी मानिस हरेक चुनौतिमा अवसर देख्दछ र निराशावादी हरेक अवसरमा खतरा देख्दछ’ उल्लेखित भनाई डेविड ब्रिंकलेको हो । परिवर्तनसंगै मानिसको मस्तिष्कमा आशा र प्रयास होइन महत्वकांक्षा हावी हुँदा त्यसको नकरात्मक असर देखिएको छ । जसले मानिसको पुरै जीवन तहसनहस बनाउन सक्दछ । एक उदाहरण १७ औ दशकमा युरोपको टल्यान्डका राजा ब्रुसको प्रसंगलाई लिन सक्छौ ।
टल्यान्डका राजा ब्रुस दुश्मनसँग हारेर एक गुफामा लुकेर अतितको बारेमा सोचमग्न थिए । बितेका दिनका सम्झनाले उनलाई सताइरहेको थियो । आशाको सुनौलौ किरण देख्नुको साट्टा उनको मनमा लगातार निराशा छाइरहेको थियो । साम्राज्य, सेना, अधिकार, वैभव, प्रतिष्ठा र परिवारको यादले उसको मन दुःख र सन्तापले भरिएको थियो । गुमेको राज्य फेरि पाउन असम्भव छ भन्ने उनलाई लाग्दथ्यो । उसलाई जीवननै भार लाग्न थालेपछि जीवन त्याग्ने निर्णय गर्छ । त्यतिबेलै गुफाको ढोकामा गएर उनको आँखा रोकिन्छ । एउटा कमिला आफ्नो शरीर भन्दा ठूलो बोझ बोकेर ढोकामा चढिरहेको थियो, तर बिचबाटै तल खस्थ्यो फेरि प्रयास गर्दथ्यो, फेरि लड्थ्यो तर कमिला निरन्तर प्रयास गरिरह्यो । त्यो दृश्य देखेर राजा बु्रसको मनमा आशा सञ्चार भयो ।
उसले सोच्यो एक सानो कमिला कयौ पटक असफल हुदा पनि हिम्मत हारेको छैन भने म त एक सामाथ्र्यवान मानिस भएर पनि किन हिम्मत हारुँ भन्ने सोचेर आत्मबिस्वासलाई बलियो बनाए । आफ्नो सबै शक्ति एकत्रित गरेर दुश्मनसँग लडे, तर दुर्भाग्यवस फेरि हारे तैपनि हिम्मत हारेनन् । राजा ६ पटकसम्म हारे, ७ औं पटक भने उनले जीत हासिल गरेरै छोडे र आफ्नो गुमेको राज्य प्राप्त गरे । यो घटना सयौ वर्ष पुरानो हो तर घटनाले दिने संन्देश सदियौसम्म यही रहन्छ यदि कोही सफल हुन्छ भने उ सधै आशावादी रहनुपर्छ ।
आशा मानिसको शुभ संकल्प हो । जसरी संसारलाई सूर्यबाट उर्जा र शक्ति प्राप्त हुन्छ त्यसरी नै आशाले मानिसमा शक्ति सञ्चार गर्छ । मान्छेको हरेक उन्नति, सफलता, लक्ष्य प्राप्तिको सञ्चार आशाबाटै हुने गर्छ । यदि आशा नरहने हो भने दुनियाँ निरस, बोझिलो हुनेगर्छ ।स्वामी विवेकानन्दले भनेका छन् ‘मानिसको लागि निराशा भन्दा ठूलो दोस्रो अरु कुनै पाप छैन । हामीले निरासलाई बिनास गरेर आशालाई आफ्नो धर्म बनाउन पर्छ ।’ प्रगतिको आधार आशावादलाई मान्दै उनले भनेका छन् ‘हे मनुष्य १ संसारमा आउनुको उदेश्य प्राप्तिको लागि तिमीले पहिले आशावादीको साहरा लिनुपर्छ ।’
“जसरी संसारलाई सूर्यबाट उर्जा र शक्ति प्राप्त हुन्छ, त्यसरी नै आशाले मानिसमा शक्ति सञ्चार गर्छ”
शिक्षा प्राप्त विध्यार्थीले निरन्तर मेहनत गर्नुपर्छ । यहि आशामा की पढेलेखेर एकदिन सभ्य, सुशिक्षित नागरिकक बन्न सकियोस्, स्भावलम्वी बनेर देश र समाजको उन्नतिमा सहभागी बन्न सकियोस् । व्यापारी धेरै लगानी गरेर व्यापार गर्छन्, मुनाफाको आशामा, संसारमा जसले जे कार्य गरिरहेका छन्, त्यसमा आशा जोडिएकै हुन्छ । त्यसको लागि आइपर्ने ठूल्ठुला समस्या झेल्न नै किन नपरोस् ।
आशावादी व्यक्ति हिम्मत र हौसला लिएर अगाडि बढे एक न एकदिन सबै मुस्किललाई छिचोलेर लक्ष्यमा पुग्दछ । मानिसमा संकटमा हरेस खाए पनि माटोबाट सुन फलाउने खुबी हुन्छ । अर्को शब्दमा भन्ने हो भने मानिसले आफ्नो भाग्य आफैले लेख्नुपर्छ । सफल हुन जो कोही चाहन्छ त्यसको लागि आशावादी हुनु आवश्यक छ ।
